Me gjithë interesimin e disa klubeve të Bundesligës, Albert Bunjaku dëshiron t’i mbetet besnik ekipit të tij Nurnberg, i cili e ngriti në kulmin e karrierës.

Për shërbimet e sulmuesit kosovar interesim kanë shfaqur Stuttgart dhe Borussia Dortmund, por 26 vjeçari e sheh të ardhmen e tij te Nurnberg, i cili po lufton për mbijetesë këtë sezon.

“Kam edhe dy vjet kontratë me Nurnberg, ku jam ngritur si futbollist. Familja ime ndihet mjaft mirë këtu. Unë vlerësoj se do ta ruajmë këtë nivel të lojës dhe do të mbesim në ligë, e pas kësaj nuk do të shkoj askund”, tha përfaqësuesi zviceran për ueb faqen gjermane focus.de.

Golashënuesi më i mirë i Nurnbergut këtë sezon, me 12 gola të shënuara, Bunjaku shihet si zëvendësues ideal i sulmuesit Cacau te Stuttgart, që planifikon të largohet. Mirëpo, edhe Borussia ka shprehur interesim për gjilanasin.

“Që Alberti ka zgjuar interesim nga Stuttgart, për këtë jemi informuar moti. Ne e dimë se cilat skuadra tjera janë të interesuara, pasi i shohim kur blejnë bileta hyrëse kur luajmë ne”, tha zyrtari i Nurnberg, Martin Bader.

Në vazhdim, Bader ka njoftuar se është në kontakt të vazhdueshëm me Bunjakun dhe me këshilltarët e tij, ndërsa paralajmëroi se do të ulet dhe të bisedojë me futbollistin dhe me përfaqësuesit e tij gjatë pauzës verore.

Nurnberg e kishte blerë Bunjakun në shkurt të vitit 2009 për 250 mijë euro nga Rot-Weiss Erfurt. “Por, ai tash ka një vlerë shumë më të lartë”, ka shtuar Bader, që është mjaft i kënaqur me paraqitjet e futbollistit kosovar. Sipas mediave gjermane, vlera e kartonit të Albert Bunjakut parashihet të jetë rreth 3 milionë euro./Express/.

Trajneri i përfaqësueses së Zvicrës në futboll Ottmar Hitzfeld për ndeshjen e nesërme miqësore me Uruguajin, ka ftuar tre futbollist shqiptar.

Krahas Valon Behramit dhe Gjerdan Shaqirit, trajneri zviceran Hitzfeld ka ftuar edhe Albert Bunjakun, ndërkohë që përfaqësuesen e Zvicrës, mungon shqiptari i katërt Blerim Xhemaili, i cili është i lënduar gjatë një ndeshje të Parmës në Serie A.

Në sy bie ftesa e bëri për të futbollistin e ri Shaqiri, i cili deri më tani ka luajtur dy ndeshje për reprezentacionin zviceran U-21 për kualifikimet në Kampionatin Evropian dhe një ndeshje miqësore për reprezentacionin U-19. Dhe kur jemi tek futbollistët shqiptar të cilët luajnë për kombëtaret e tjera të themi se Suedia, për ndeshjen miqësore me Uellsin ka ftuar Emir Bajramin.